Oorsig

Die Skool vir Voorgraadse Programme is verantwoordelik vir die bestuur van die voorgraadse kwalifikasies wat deur die Fakulteit Regte aangebied word. By hierdie sentrum vir onderrig-leer is ons verbind tot akademiese uitnemendheid, het ons ’n innoverende benadering tot regsonderrig en het ons ten doel om hoë gehalte regsonderrig op voorgraadse vlak aan te bied. Ons wil egter nie bloot net regskennis oordra nie, maar streef daarna om ons studente toe te rus met die nodige vaardighede en waardes wat noodsaaklik is om die uitdagings rondom toetrede tot die regsprofessie, die hoof te bied. Ons oogmerk is om gegradueerdes met ‘n passie vir reg en geregtigheid, met ‘n sosiale bewustheid, met ‘n kritiese ingesteldheid en met integriteit af te lewer. Daarom word alle pogings aangewend om ons studente te bemagtig en te vorm sodat hulle in staat is om as juriste ‘n bydrae tot die ontwikkeling van die samelewing en die regstelsel te lewer.

Voorgraadse kwalifikasies

Die Skool vir Voorgraadse Programme is verantwoordelik vir die aanbieding van die volgende kwalifikasies, naamlik:

  1. ‘n Baccalaureus Artium met Regsvakke (minimum tydperk 3 jaar);
  2. ‘n Baccalaureus Commercii met Regsvakke (3 jaar), en
  3. ‘n Baccalaureus Legum as eerste graad waarvan die minimum duur 4 jaar is. Die LLB word ook as ‘n tweede graad aangebied vir studente wat reeds oor ‘n BA Regte of ‘n B Com Regte beskik.

Die skool is versprei oor drie kampusse, naamlik Vaaldriehoek, Mafikeng en Potchefstroom. Die volgende programme word op elkeen van die kampusse aangebied:

  • Vaaldriehoek: ‘n Baccalaureus Artium met Regsvakke en ‘n Baccalaureus Commercii met Regsvakke.
  • Mafikeng: ‘n Baccalaureus Commercii met Regsvakke en ‘n Baccalaureus Legum (LLB).
  • Potchefstroom: ‘n Baccalaureus Artium met Regsvakke, ‘n Baccalaureus Commercii met Regsvakke en ‘n Baccalaureus Legum (LLB).

Op elke kampus word die skool verteenwoordig deur ‘n Adjunk-Direkteur wat verantwoordelik is vir die dag tot dag implementering van die programme wat op die betrokke kampus aangebied word en wat verantwoording doen aan ‘n Direkteur wat deel uitmaak van die Dagbestuur van die Fakulteit Regte.

Moontlike loopbane

Ons gegradueerdes is toegerus om tot enige van die onderstaande loopbane toe te tree:

  • Die akademie
  • Die regsprofessie (prokureurs en advokate)
  • Regsadviseurs
  • Staatsdiens: advokate, prokureurs, staatsaanklaers, landdroste, regters (met die nodige ervaring).

Studierigtings